Am 8.Mai 2023 isch es ändlich losgangä.En Flugi vo dä Helvetic hätt eus uf Frankfurt gflogä.Vo döt isch es mit dä Condor wietergangä zu eusem erschtä Ziel ; Toronto .
In Toronto hämmer ganz e tolli Unterkunft imä Hochhuus im 38. Stock gfundä.Die Ussicht,eifach herrlich!
Toronto isch mit rund 6.69 Mio.Iwohner di bevölkerigsrichschti Stadt vo Kanada.Zudem sind rund 50 % devo Imigrantä.Es isch ä sehr läbhafti und interessanti Stadt und mer fühlt sich eigentlich überall sehr sicher. Bekannt isch vor allem natürlich dä berüehmti CN-Tower,wo mit sinä 553 m Höchi bis 2009 dä höchschti Fernsehturm vo dä Wält gsi isch. Mir händ natürli müessä usprobierä,wie d`Sicht uf d`Stadt vo do obä isch…und händ dezue es feins Nachtässe gnossä. Morn verlönd mir Toronto und flüged wieter nach Halifax,wo (wänn alles guet goht) eusen Camper uf eus warted.
